दुर्गम बस्तीको विद्यालय नमूना बन्दै

माघ ७, डडेल्धुरा । डडेल्धुराका दुर्गम बस्तीका सामुदायिक विद्यालय नमूना बन्दै गइरहेका छन् । निजी तथा संस्थागत बोडिङ छोडेर अभिभावक आफ्ना बालबालिकालाई सामुदायिक विद्यालयमा ल्याउन थालेको शिक्षक बताउँछन् ।

डडेल्धुराकै दुर्गम महाकाली किनारको बस्तीकी प्रतिभा शाही घर आँगनकै बोडिङ छोडेर यो वर्षदेखि भुवनेश्वरी माध्यमिक विद्यालयमा भर्ना भएकी छन् । उनी मात्रै नभई उनका छिमेकी २० जना यो विद्यालयमा भर्ना भएको शिक्षक बताउँछन् ।

विद्यालयले बोडिङ स्कूलझैँ अङ्ग्रेजी माध्यममा पढाउन शुरु गरेसँगै विद्यार्थी निजी विद्यालय छोड्दै सामुदायिक विद्यालयमा आउन थालेका छन् । विद्यार्थी अभावमा स्कूल बन्द भइरहेको बेला यो स्कूलमा भने विद्यार्थी थेगी नसक्नुभएको भुवनेश्वरी माविका प्रधानाध्यापक डम्बरबहादुर थ्वालले बताए ।

सुदूरपश्चिमका पहाडी जिल्लामा दर्जनौँ विद्यालय विद्यार्थी अभावमा बन्द हुने अवस्थामा पुग्ने थालेका छन् तर डडेल्धुराको दुगर्म बस्तीमा महाकाली किनारमा रहेको एक विद्यालयमा भने विद्यार्थी थेगी नसक्नु अवस्थामा छ । निजी विद्यालय छोडेर विद्यार्थी यो विद्यालयमा भर्ना भएका छन् ।

विद्यालयमा नियमित खेलकूद र अतिरिक्त क्रियाकलापसँगै हरेक साता विद्यार्थीमैत्री कसरी बनाउने भन्ने विषयमा अभिभावक छलफलमा समेत जुट्ने गरेको स्थानीय अभिभावक खेमराज भट्टराईले जानकारी गराए । विद्यालयले दैनिक ५६२ विद्यार्थीको नियमित अनुगमन गर्ने गर्दछन् । र विद्यार्थीको पढाइ सरसफाइ लगायत अतिरिक्त क्रियाकलापको समेत जानकारी गराउने कार्य भइरहेको प्रअ थ्वालले जनाए ।

दुर्गम बस्तीमा रहेको यो विद्यालयमा शैक्षिकस्तर बढाउनका लागि भरपूर्ण मिहेनत गर्न शिक्षकले प्रतिबद्धता जनाउँदै विशेष कार्ययोजनासमेत निर्माण गरी लागू गरिरहेको जनाएका छन् ।

विसं २०३० मा स्थापना भएको विद्यालयले बाल विकासदेखि कक्षा १२ सम्म सञ्चालन गरेको छ । विद्यालयमा आधुनिक पुस्तकालय र कम्प्युटर कक्षासमेत नियमित सञ्चालन हुने गरेका छन् । शैक्षिकस्तर सुधार, आधुनिक शिक्षा प्रणाली लागू गर्ने गुरुयोजना बनाएको प्रअ थ्वालले जनाए ।

सरकारी र गैरसरकारी संस्थाको प्रयासमा डडेल्धुराका सामुदायिक विद्यालय नमूना बन्दै गइरहेको यस वर्ष पनि शिक्षा क्षेत्रमा यो जिल्ला अगाडि रहने शिक्षा विकास तथा समन्वय एकाइका निमित्त प्रमुख नाराणदत्त भट्टले बताए । रासस