लघु जलविद्युत्ले खिवाङ गाउँ झिलीमिली

सन्तोष गौतम
२८ जेठ, बाबियाचौर– म्याग्दी ।

म्याग्दीको धौलागिरि गाउँपालिका ४ स्थित खिवाङ छहरीखोला लघु जलविद्युत् परियोजनाबाट उत्पादित बिजुलीबाट खिवाङ गाउँ झिलीमिली बनेको छ ।

छहरी खोलाको पानी प्रयोग गरेर २० किलोवाट क्षमताको खिवाङ छहरीखोला लघु जलविद्युत् परियोजना निर्माण भएपछि म्याग्दीको विकट क्षेत्रमा पर्ने खिवाङ गाउँमा विद्युत् सुविधा पुगेको हो ।

बेलायती र भारतीय पूर्व गोर्खा सैनिकको पहलमा गोर्खा वयलफेयर र कादुरी संस्थाको सहयोगमा निर्माण भएको सो परियोजनाबाट खिवाङका १७० घरधुरी लाभान्वित भएको स्थानीय अगुवा चित्रबहादुर पुनले बताए ।

२ करोड ४ लाख ५९ हजार ७४६ लगानीमा निर्माण सम्पन्न भएको सो परियोजना सञ्चालनमा आएपछि उज्यालोका लागि बत्ती बाल्न, टिभी हेर्न, मोबाइल, ल्यापटप चार्ज गर्न, विद्यालयमा कम्प्यूटर विषयमा पठनपाठन सञ्चालन गर्न सहज भएको छ ।

यसअघि सोलार र टुकीको भरमा रात कटाउँदै आएका खिबाङवासीको जीवनशैली सुधारका लागि लघु जलविद्युत् परियोजना सहयोगी बनेको स्थानीयवासी थमबहादुर गर्बुजाले बताए । हालसम्म केन्द्रीय प्रशारण लाइनको विद्युत् सुविधा नपुगेको धौलागिरि गाउँपालिकाको गुर्जा, मुना, मल्कवाङ, खिवाङ र मराङका बासिन्दा उज्यालोका लागि लघु जलविद्युत् परियोजनामा निर्भर छन् ।

गत साउनमा आएको पहिरोले ३५ किलोवाट क्षमताको दरखोला दोस्रो लघु जलविद्युत् परियोजना र नहर पुरेपछि २ नम्बर वडामा पर्ने लुलाङका बासिन्दा अन्धकारमा रात कटाउन बाध्य छन् ।

गाउँपालिकाले ७ नम्बर वडा धारापानीदेखि केन्द्रीय प्रशारण लाइन विस्तारको काम शुरु गरेको अध्यक्ष थमसरा पुनले बताए । ३२ लाख विनियोजित योजनाबाट धारापानीका १५० घरमा यसै वर्ष बिजुली बाल्ने योजना छ ।

भगवतीका अधिकांश योजना सम्पन्न

यसैगरी, रघुगंगा गाउँपालिका २ राखु भगवतीमा चालू आव २०७४÷७५ सञ्चालित अधिकांश पूर्वाधार योजनाको निर्माण कार्य सम्पन्न भएको छ ।

गाउँपालिकाको सबैभन्दा ठूलो बस्ती रहेको भगवतीमा चालू आवमा १ करोडभन्दा बढी लागतका ४२ वटा पूर्वाधार योजना सञ्चालन भएका थिए । तीमध्ये ४० योजनाका उपभोक्ता समितिले काम सकेका र दुई वटा योजना निर्माणाधीन अवस्थामा रहेको वडाध्यक्ष रिमबहादुर कटुवालले जानकारी दिए ।

शिक्षा, स्वास्थ्य, सडक, खेलकुद मैदान, खानेपानी योजना, विद्यालयको भौतिक पूर्वाधार मर्मत, सामुदायिक भवनलगायतका योजना रहेका छन् । पहिरोको जोखिममा रहेको माझखर्क बस्ती संरक्षणका लागि विनियोजन भएको १८ लाखको काम पनि सम्पन्न भएको छ ।

नौ लाख विनियोजित रानीपौवा–बनाखी–माझखर्क (बेनी–जोमसोम सडकको गलेश्वर– बेगखोला खण्डको वैकल्पिक) सडकको ट्रयाक खोलिएको अध्यक्ष कटुवालले बताए । पर्यटकीयस्थल रुइसेमा सडक र पदमार्ग विस्तार, भ्यु टावर निर्माण शुरु तथा नौली बराह ताल पनि संरक्षण गरिएको छ ।
रासस