सडक निर्माणमा विवाद हुँदा एकको मृत्यु

२३ बैशाख, गौशाला । महोत्तरीको औरही नगरपालिका–६ खोपी गाउँमा सडक बनाउने सम्बन्धी विवादमा एक जनाको मृत्यु भएको छ ।

मृत्यु हुनेमा औरही नगरपालिका–६ बस्ने अन्दाजी ५८ वर्षीय लाल भन्ने लालबाबु दास रहेको जिल्ला प्रहरी कार्यालय महोत्तरीले जनाएको छ ।

शनिबार राति ७ बजेतिर सो गाउँमा सडक बनिरहेको विषयमा दुई समूहबीच कुटाकुट हुँदा दासको मृत्यु भएको प्रहरी उपरीक्षक कुबेर कडायतले बताए ।

प्रहरीले घटनामा संलग्न रहेको आशंकामा स्थानीयवासी ६५ वर्षीय शिवशरण दास र ३२ वर्षीय इन्द्रजित दासलाई गए राति नै पक्राउ गरी जिल्ला प्रहरी कार्यालय महोत्तरीमा ल्याएको छ । रासस