‘खराब शिक्षकलाई बर्खास्त गरौं, सरुवा गरे अरू विद्यालय पनि बिर्गाछन्’

स्थानीय खबर संवाददाता
काठमाडौं, २४ पुस

खराब आचरण भएका र गलत क्रियाकलाप गर्ने शिक्षकलाई सरुवा गरेर थप अरू विद्यालय बिगार्न दिन नहुनेमा सरोकारवालाहरूले जोड दिएका छन् । गाविस राष्ट्रिय महासंघले अयोजना गरेको कार्यक्रममा स्थानीय शासन विज्ञ कृष्णप्रसाद सापकोटाले सरुवा गरे उसले अर्को विद्यालयलाई पनि बिगार्ने भएकाले बर्खास्तसम्मको कारवाही हुनुपर्ने बताए ।

“खराब शिक्षकलाई सरुवा गरे उसले राम्रो विद्यालय पनि बिगार्छ, बर्खास्तै गरौं । सरुवालाई दण्ड दिने मापदण्ड नबनाउँ,” स्थानीय तहको नमुना शिक्षा ऐन निर्माणसम्बन्धि उक्त कार्यक्रममा भने, “कार्यरत अन्य शिक्षकहरूको बृद्धि विकास सूचकमा आधारित कार्यसम्पादनका आधारमा हुनुपर्छ । स्थायी गरेर जागिर जोगाइदिने होइन । यसबारे स्थानीय शिक्षा ऐन स्पष्ट हुनुपर्छ ।”

दोलखाको मेलुङ गाउँपालिकाका अध्यक्ष नरबहादुर श्रेष्ठले पनि शिक्षकले खराब आचरण र व्यवहार देखाए बर्खास्तसम्मकै कारवाही गर्नुपर्ने बताए । “हामीमध्ये धेरैले शिक्षक चुरोट तान्दै विद्यालय जाने, ओंठमा खैनी हालेर कक्षामा पढाउने, जाँडरक्सि खाएर हल्लिँदै हिँडेको देखेका छौं,” श्रेष्ठले भने, “त्यस्ता शिक्षकलाई सरुवा गर्न हुन्न, अरु विद्यालय पनि बिगार्छ । अरूखाले कारवाही हुनुपर्छ । यो काम मेरै गाउँपालिकाबाट सुरू गर्छौं ।”

महासंघले गाउँपालिकाहरूलाई लक्षित गरि शिक्षा, स्वास्थ्यसहित ४ वटा नमुना ऐनमाथी छलफल गरेको थियो । महासंघले गाउँपालिकाहरूलाई सहज पार्न नमुना कानुनहरूको निर्माण गरिरहेको छ ।